Waz ist Minne

Saget mir ieman, waz ist minne?
weiz ich des ein teil, sô wist ichs gerne mê.
der sich baz denn ich versinne,
der berihte mich durch waz sie tuot sô wê.
minne ist minne, tuot sie wol;
tuot sie wê, sô heizet sie niht rehte minne.
sus enweiz ich, wie sie danne heizen sol.

Obe ich rehte râten künne,
waz die minne sî, sô sprechet denne jâ.
minne ist zweier herzen wünne:
teilent sie gelîche, sôst die minne dâ:
sol abe ungeteilet sîn,
sô enkans ein herze aleine niht enthalten.
owê, woldest dû mir helfen, vrouwe mîn!